المساعد الشخصي الرقمي

مشاهدة النسخة كاملة : باع بيته عشان سفرة الصيف


خطيبة كامي
17-04-2009, 01:34 PM
في نص الشهر ما يسوق السيارة.. لأن ما عنده بيزات حق بترولها


"أدين وأزين" مثل ينطبق على فئة معينة من الناس، ويا كثرهم، تحب تديّن عسب تشتري أشيا ما لها داعي، أو أشيا مفيدة لكن بسعر مبالغ عشان بس تنفش ريشها قدام الناس. وايدين يحطون على راسهم ديون الدنيا بس عشان الأشياء التافهة اللي من ضمنها "السفر"، تشوفه الواحد يتسلّف ويسافر ويا أهله أو ربعه المكان الفلاني ويهلّك عمره بالمصاريف، عسب الناس تقول فلان سافر. تخيلوا في واحد باع بيته وسيارته وسيارة حرمته عشان يسافرون أوروبا، وعقب ما ردوا أجر شقة وجلس هو وأهله فيها.. بالله عليكم، هذا إنسان صاحي؟

شباب وشابات وايدين يوم يتوظفون يشترون سيارة سعرها يكسر الظهر.. ولو الواحد سيارته من سنة "شيء وحطبه" وبغى يغيرها مب مشكلة يتسلف من البنك، بس ياخذله سيارة قيمتها معقولة، مب يشتري له "بورش كايين" أو "بنتلي" مثلاً وهو موظف على قده، بالتالي في نص الشهر ما يسوق السيارة، لأن ما عنده بيزات حق بترولها. وكل سنة أو سنتين إذا نزلت سيارة جديدة يسوي نفس الشيء، وهاجذه عايش طول عمره مديون، بس عشان يتخقق بالسيارات.

تصدقون أن وحده خذت قرض من البنك عشرين ألف درهم عسب بس تشتري ساعة من الماركة الفلانية.. صدق ما عندها سالفة. وفي ناس وايدة تحط على عمارها ديون بمبالغ خيالية توصل أحياناً للمليون درهم عسب مصاريف العرس، وإتم البنت وأهلها يقولون إنهم سوّوا عرسها في القاعة الفلانية في الفندق الفلاني وفستانها عند المصمم العالمي ويسوى مادري كم.. الخ، ويوم ما يستوي توافق بين الطرفين يتم الطلاق، يتم الريال مديون ويمكن بعدها يتعقد ويشل من راسه فكرة الزواج من بنت البلاد مرة ثانية.. ويا كثر الأمثلة العجيبة اللي نشوفها هالزمن من هالناس.

بقلم منى داود

KAME1582
22-05-2009, 11:23 AM
ماقول غير الحمدلله على نعمه العقل

ومشكوووووووووور أخوي