بسم الله الرحمن الرحيم
السلام عليكم و رحمته و بركاته
كيفكم ؟؟
اوكي بدي اليوم افتح نقاش عن مشكلة منتشرة بقوة في المدارس و الجامعات و الكل يعاني منه
و انا مابدي افتح النقاش الا الاني بصراحة عانيت من المشكلة دي من صحبات و معلمات
__________________
و من الأساس فكرة ان بنت تتعلق ببنت دي مشكلة عويصة و لها سنين و ما اتحلت لين دحين
و دا الشي اكيد مايبسط الواحد بالعكس ينكده بزيادة
على فكرة ان كان الموضوع سلبياته اكتر من ايجابياته فاضن انه لازم ينحدف
و انا اعمل اللي عليه يعني ممكن اكون غلطانة و ممكن اكون انا الصح
و اللي يشوف انه يقدر يفيدنا في الموضوع يتفضل معانا في النقاش ^^
__________________
اوكي ندخل في الموضوع على طول
ان بنت تعجب بولد دا الشي من فطرة الإنسان
و ان ولد يعجب ببنت دا كمان من فطرة الإنسان
بس ان بنت تعجب ببنت لدرجة العشق و الهيام دي جديدة
ممكن البعض يقول مو معقولة يحصل كدة
و البعض كمان ممكن يقول عادي ماوصل لحد الشذوذ
و البعض يقول عادي صداقة بس
لا حبيبي معقولة و الف معقولة لو ما كنت مصدق نعطيك بعض الأمثلة
و انتوا التانيين خليكم سامعين لين ما نخلص بعدين قولوا رايكم
*رجال يطلق زوجته بعد مايعرف انها هيمانة بوحدة تانية غيره و ان ماله مكان في قلبها
*بنت تنحت في يدها على شكل حرف معجبتها اما بالنار او بالمقص او اي طريقة تانية
*بنت تسجل صوت معجبتها على كاسيت عشان لمن تشتقلها او تبغى شي يخفف عنها تشغله
*بنت تبيع اغلى صحباتها و تذل نفسها عشان خاطر معجبتها و المشكلة تكون عارفة انها ماتحبها ><
*بنت تضيع مستقبلها و ترسب نفسها عشان تبقى مع معجبتها
*بنت تسرق من جيب ابوها فلوس عشان تشتري لمعجبتها هدية
*بنت تغير هويتها و كيانها انها بنت و تتحول لولد و زي مايسموهم البويات
*بنت تضارب مع بنت تانية عشان وحدة معجبين بيها و هية حق مين
لحد ان المضاربة توصل لشد الشعور و تشقيق الملابس و خروج الدم من الراس
دحين تجي على راسك علامة استفهام كبيرة
ايش الأسباب اللي تخلي الوحدة زي كدة يعني معقولة بس عشانها فترة مراهقة ؟؟
طيب اللي حوليني ليش مهم كدة ؟؟
انت اللي حولينك مشالله كويسين عشان كدة ماتشوف دي الأشكال
اما الأسباب انا اقلك الأسباب من وجهة نضري
*الشخصية الضعيفة و الآمال المحطمه
*مافي قدوة كويسة او القدوة بنفسها خربانة ابو كلب
دحين تجي على بالك علامة استفهام تانية بس اصغر من الأولى
طيب ايش العقاب اللي ربنا ح يعاقب بيه الي يعمل زي كدة ؟؟
و ايش الاضرار الي تكون من نفس الإعجاب؟؟
*ضيق في قلبها ممكن تكون ماتعرف السبب
*دايما حزينة و مال امها داعي للحياة
*حياتها تكون صعبة و مليانة مشاكل
*يقل العمر بسبب قلة البركة
*ضياع الوقت في شي مال ابوه داعي
و كمان علامة استفهام صغيرة شوي
طيب كيف تتواصل مع معجبتها ؟؟
اول وسيلة و الي هية الرائجة
الرســــــــائل الغراميه
الوساطة والمـــــــــلاحقة <<<<<<<اخس اسلوب تحس انك مرة مو مرتاح
مكالمات التلفون الي ممكن توصل للاربع ساعات او اكتر و قد حصلت
الملامسات الجسديه والصور التذكاريه
دحين مافي علامة استفهام دحين في علامة تعجب على راسك
*و تغير الصحبات الخربانين
*تغير القدوة إلى قوة حسنة
و اول قدوة لازم نتبعها النبي عليه الصلاة و السلام
الخوف من سوء الخاتمة
و لازم على كل الأهالي يتقربوا من بناتهم خاصة الأمهات
يعني لاتقولي دي بنتي مالها أي فايدة انصحها ولا كاني اعمل شي
كاني باكلم الجدار او قربة مخروقة
كدة انتي اللي تكوني الغلطانة وقتها
انتي لا تنصحيها لانها اكيد ماراح تقبل النصيحة انتي كل اللي عليك تتقربي منها
و تكوني زي صحبتها بعدين وقتها يحلها الف حلال
و مو اول ماتسمعي شي على نياتك تقومي تنشريه بدون ماتحسي
خلي بنتك تحس انك بيرها اللي مستحيل احد يعرف ايش الي فيه
اخوها او اختها بس طبعا مو زي لمن تكون الأم بنفسها
دحين الي تقول مو معقولة خلاص فهم و عرفت
نجي للإتنين اللي يقولوا عادي و صداقة
ها كل دا و كمان عادي و صداقة انشالله تكونوا غيرتوا رايكم
__________________
انا ما اقول ان خليك منكبته على نفسك ولا تعجبي بشي من احد
لا اللي اقوله ممكن يعني الوحدة تعجب
بس مو تعملي هيلامان و تنشير دا الشي
مثلا عجبتك طريقة كلام وحدة من البنات او شكلها
مو تروحي و تقوليلها انا معجبتك
و توهمي نفسهك و تذليها عشان دا السبب
عجبتك وحدة ماله داعي تقولي لفلانة و علانة و زعطانة
خلي دا الشي في قلبك و امشي في حياتك تمام
لان اللي خلقها اكيد خلق في احلى منها
فلا توهمي نفسك على شي فاضي
__________________
و بكدة انا انتهيت من موضوعي
اتمنى تكونوا اخدتوا فكرة شاملة عن راي في الموضوع
و انا حابة اتناقش معاكم فيه يعني ايش الأسباب و الحلول برايكم ؟؟
__________________
*الموضوع بمجهودي الشخصي بليز لحد ينقله و الي يبغى ينقله يكلمني بليز
__________________
تحياتي :
Safi Naz
الموضوع الأصلي :
صداقة أم إعجاب...}~ || الكاتب :
Safi Naz || المصدر :
منتديات أنيدرا