باليابان~
اوساكا~
هيديكي كان بيروح لبيت وجدان عشان يتفاهم مع خالد بس لقى ميتشيرو بطريقه وكانها كانت تركض من مسافة بعيدة عشان توصل له..
هيديكي: ميتشيرو؟!
ميتشيرو وقفت شوي عشان تاخذ نفسها : هيديكي لا تروح لوجدان لا تسبب لها مشاكل اكثر من كذا!! ليش تبغى تخرب عليها ؟؟هي كانت تحب نايف وللحين تحبه بس انت شوشتها !
هيديكي ماعجبه كلام ميتشيرو: انا ماسويت لها شي هي تحبني انا !!وانا لوحدي !!!
ميتشيرو ابتسمت ابتسامة مجروحة: هيديكي صدقني انت ماتحبها انت بس كنت تبغى احد يعطيك اهتمام وما لقيت الا وجدان تعطيك اياه
هيديكي وهو معصب: ليش شايفتني ناقص حنان والا اهتمام عشان اسوي كذا؟
ميتشيرو: اذا انت صدق تحبها اجل اتركها ترجع
هيديكي: عشاني احبها ماراح اخليها ترجع .. ابعدي عن طريقي!!
ميتشير مسكت هيديكي وبدت تصرخ: لا ماراح اخليك تروح لها!! انت ماتحبها!!
هيديكي دف ميتشيرو على الارض وناظرها بنظرة استحقار: لا تحسبين انك بكلامك هذا بتخليني اتركها واحبك انتي!!
ميتشيرو انجرحت لما هيديكي دفها لان رجلها احتكت بالارض وساقها كان ينزل منه دم لكن ميتشيرو تحملت الالم ومسكت هيديكي مع رجوله: هيديكي انت اذا رحت هناك اخوها يمكن يأذيك وانا... ا... انا ما ابغاك تتأذى
هيديكي وخر رجله عن ميتشيرو وكمل طريقه ....
ميتشيرو كانت تبكي وتنادي هيديكي من بعيد لكن هو ما التفت لها ولا حتى عبرها..
هيديكي وصل عند بيت وجدان بعدين كانه تردد.. يروح يتفاهم مع اخوها او لا؟! بعدين فكر بشي
.................................................. .................................................. ....
.................................................. ................................................
.................................................. ........................................
بالسعودية ~
ببيت ابو راكان~
العنود : لا ليش نروح مطعمين بس تشيليز!!!
نوال: ليش الحسد ؟! خلاص لاتاكلين بابلبيز
البندري: خلاص راسي صدع طيب انا عرفت ..نسوي قرعة خلاص!! وش رايكم؟!
العنود: ايه خلينا نسوي
نوال: طيب كل وحدة تكتب المطعم اللي تبيه ونخلط الورق واللي يطلع
البندري: طيب وراكان وريان؟؟
العنود: ليش وش نبي فيهم؟؟
نوال: يا ذكاء انتي مين بيودينا الا هم
العنود: طيب بس راكان اما ريان ما منه فايدة
نوال: عاد منه فايدة والا لا؟؟ ناشب لنا نشبة ..الا مطعم ومايروح له ههههههه اخوي وعارفته مايفوت الاكل اللي ببلاش مادي
البندري : طيب يلا روحي خذي من ريان وراكان اسماء المطاعم بورقة وهاتي الاوراق ويصير نشوف أي مطعم نروح له..
سووا قرعة وطلع المطعم هو ...... ابلبيز~
العنود انصدمت : لا خير وشو ابلبيز؟؟
نوال: شفتي لو خليتينا نروح مطعمين هههههه.. يلا خلاص مافيه !!
العنود: لا انا لازم اشوف كم شخص اختار ابلبيز
ولما فتحت العنود الورق كانت 3 ابلبيز و2 تشيليز
العنود: خلاص انا ما احب الا بي بي على الاقل اختارت تشيليز
البندري: ههههههه انا ما اخترت تشيليز وبعدين هذا مب خطي
نوال دخلت بالورقة اللي مع العنود: هالخط الخايس مافيه الا انسان واحد يكتب فيه –قصرت صوتها- اقول لك مين؟!
العنود عرفت ان قصدها ريان بس اكيد صدفة لانه يحب غيرها..
راحوا لابلبيز بالليل على الساعة 11 ~
نوال: ليش خليتونا نروح متاخر يعني لو جينا من 9 مو احسن؟؟
راكان ابتسم لكن ماعلق
ريان: انا عني احب هالوقت .. بقوم شوي وارجع ،،اطلبوا لي باستا
راكان: وين رايح؟!
ريان كان مرتبك: ا.. انا شوي هناك .. بشم هوا وارجع
طلع ريان برا المطعم وكانه ينتظر شي
الساعة صارت 12 الا عشر وريان للحين مارجع واكله برد
البندري: راكان وين ريان؟؟
راكان: مدري عنه
نوال: غريبة تاخر
العنود قامت من مكانها
البندري: عنودة وين رايحة؟؟؟
العنود: To the ladies room,I'll be right back
لغرفة السيدات (الحمام), برجع على طول
وطلعت العنود برا المطعم بدون ماينتبهون
راكان كان يناظر ساعته خلاص ما بقى شي على الساعة 12
لما صارت 12 جاؤ رجال المطعم ومعهم كيكة مكتوب فيها “happy birthday bunny and anoda”
راكان صاير ينادي البندري بنِّي يعني ارنوبة او مرات ماي بنِّي يعني ارنوبتي
البندري استانست بالمفاجاة الحلوة اللي سواها لها زوجها هو ونوال وريان طبعا معهم وكان يعرف بالمفاجاة
العنود طلعت برا المطعم وكانت تتلفت تدور على شي وبعدين لقت ريان قاعد بالسيارة وراحت عنده
ريان طلع من السيارة لما شافها عرفها حتى وهي متغطية : وش تسوين هنا؟!
العنود: Nothing, I just wanted to see why you took so long, and your food is cold by the way
ولا شي , انا بس بغيت اشوف ليش طولت ، وبالمناسبة اكلك برد
ريان: تدرين امنيتي كانت انك تطلعين من المطعم قبل الساعة 12 عشان اسمعك شي حلو.. والحمدلله انك طلعتي, كنت انتظرك
العنود مافهمت وش يقصد بس بعدين ناولها جواله بعد ما شغل لها تسجيل صوتي هو مسجله "عيدميلاد سعيد اليوم انتي كبرتي وصرتي عجوز هههههه لا امزح بس كنت اتمنى اكون اول من يهنيك بعيدميلادك واقول اني احبك واني انا ما احب الا انتي وانتي الوحيدة بحياتي واتمنى انك تعرفين هذا الشي زين ,,, احبك نودتي"
العنود دموعها كانت تنزل وانه حتى الكلام اللي كانت تحسب انه يقوله لبنت ثانية كان يقوله لها .. لها هي وبس
العنود حست انها طولت فكانت بتدخل المطعم لكن قبل ماتدخل رجعت الجوال لريان : I have to go back
لازم ارجع
ريان حس بخيبة امل لما قالت كذا بس بعدين التفتت له وقالت بصوت كله حياء : By the way ,I loved your gift.. it made my day
بالمناسبة ، حبيت هديتك.. فرحتني (الكلمة اصلا معناتها زي انك ابهجتني او اسعدت يومي)
ريان طار من الفرح لما العنود قالت كذا
العنود رجعت للمطعم ولقتهم قطعوا الكيكة عنها وبداؤ ياكلون
نوال: صح النوم.. بدري، تو الناس!! وينك سنة؟
العنود: اول شي صح النوم تنقال للي توه قايم وانا كنت بالحمام
البندري: عنودة بتتهاوشون حتى بعيدميلادنا؟! طيب اجلوها لبكرا
العنود: ههههههههه مع انه مب من طبعي أأجل الشي ،بس عشانه عيدميلادنا
نوال: اقول عنودة احسك رجعتي فرفوشية وش صار؟؟
العنود: وحدة من البنات قالت لي "عيدميلادسعيد،" وفرحتني
ريان رجع لهم بالمطعم
ركان: وين كنت؟! ادق عليك ماترد.. احتفلنا واكلنا ، واكلك برد
ريان: هههههه ايه انا نمت بالسيارة وجوالي كان على الهزاز بس اشوا اني حسيت باخر مكالمة
ولما رجعوا البيت كملوا سهرتهم طبعا راكان نام اول مارجع البيت .. ريان كان يلعب بالـ Ps3 اما البنات سووا بوبكورن وحطوا فيلم مرعب يتفرجونه ...
.................................................. .................................................. .............................
.................................................. .................................................. .........................
.................................................. .................................................. ...............
باليابان~
اوساكا~
بقى يوم على رحلة وجدان للسعودية وطبعا اخوها مب مخليها تطلع من البيت ابد.. لكن بالظهر دق على خالد واحد من الموظفين اللي بالشركة عشان شي مهم وضروري وماينفع الا خالد اللي يسويه.. خالد توهق وش يسوي بوجدان ياخذها معه والا يخليها؟ لكنه قرر ياخذها معه بس لما راح لغرفتها لقاها نايمة فقرر يتركها ولانه اصلا ماراح يطول...
هيديكي كان ينتظر عند بيت وجدان من الليل بس بمكان مايمدي خالد يشوفه فيه و اول ماطلع خالد ,هيديكي دخل من الدريشة بدون محد ينتبه له .. راح لغرفة وجدان ولقاها نايمة شافها كانت مرهقة مو مثل اول وكان باين عليها الضيقة حتى وهي نايمة.. فقرر يسوي الشي اللي مايبغى يسويه .. ترك لها رسالة وطلع وتركها بعد ماحبها على راسها ....
خالد رجع البيت وراح يشوف وجدان اللي لقاها نايمة بنفس مكانها فراح يرتب شنطته عشان يمكن يقعد يومين بالسعودية على مايكون فيه رحلة لاوساكا..
وجدان قامت من نومها وكانت تبغى ترجع تنام عشان تنسى اللي فيها لكنها لمحت رسالة كانت تحتها
وكانت بحروف الياباني -الهيراغانا- (عشان وجدان ماتقرا كانجي كثير ولان هيديكي خاف يكتب انجليزي وتطيح بيد خالد )
[ إلى : وجدان.. ما اعرف وش اكتب لك لاني ما اكتب رسايل وهذي اول رسالة انا اكتبها (وجدان بلعت ريقها وهي تقرا) كانت هذي اسعد سنة لي بحياتي وانا فرحان مرة اني تعرفت عليك شكرا لانك علمتيني احب غيري وشكرا لانك علمتيني ما اشوف نفسي وشكرا لانك صادقتيني وشكرا لانك خليتيني احبك.. اسف لاني شوشتك واسف لاني جرحتك واسف لكل دمعة نزلت من عينك وكنت انا سببها واسف لاني بخليك تروحين وتتركيني .. انا حبيت طريقة كلامك حبيت ابتسامتك , ضحكتك , هبالتك .. لكن بالايام اللي بديتي تتشوشين بسبتي كل شي حبيته فيك خليته يختفي ..كلامك وابتسامتك اختفت ضحكتك كان فيها حزن وهبالتك ماصارت موجودة.. وبالنهاية انا اسف على كل شي,, انتي كنت وبتكونين من احلى الاشياء بحياتي وانا كنت وبكون الشي اللي خلاك تحزنين بحياتك انا راح اغادر بس اتمنى انك تسامحيني....... ســايــونــارا وجدان]
وجدان قعدت تصيح لما قرأت رسالة هيديكي ومافهمت وش كان يقصد ب "اغادر" وكانت تبغى تكلمه باي طريقة.. تبغى تشوفه ,او تعرف وش صار له..
وجدان قررت تنحاش من الدريشة .. لازم تشوف هيديكي خلاص وتقول له مشاعرها تجاهه , كانت تدري ان اخوها لو عرف ومسكها ماراح يصير لها طيب بس ماكانت حاسة بنفسها وهي تحاول تنزل من الدريشة ... طلعت وجدان من الدريشة ودموعها بعيونها ورسالة هيديكي بيدها وراحت للمدرسة تدوره ....
ركضت وجدان ودورته بس بدون فايدة ولما سالت الاستاذ حق الصف قال لها ان هيديكي ماجا اليوم للمدرسة وسألت عن ميتشيرو واللي كانت بعد مب موجودة .. طلعت وجدان من المدرسة وراحت لبيت هيديكي ولما سألت امه قالت لها ان هيديكي مارجع البيت من يومين طبعا هذا الشي كان عادي عند امه لانها مربية هيديكي يسوي اللي يبي وينام بالمكان اللي يبيه , وجدان زاد خوفها وفكرت تروح لبيت ميتشيرو..
ببيت ميتشيرو~
وجدان طقت الباب وانتظرت احد يفتح لها ..
ميتشيرو فتحت الباب ولما شافت وجدان حست بغصة بحلقها: ااه وجدان؟؟
وجدان وصوتها كان يتقطع من الركض والخوف : ميتشيرو ساعديني ميتشيرو انا مو قادرة القى هيديكي
ميتشيرو: هيديكي؟! وش فيه؟! وجدان وش فيه!!!
وجدان وهي تمد الرسالة اللي بيدها لميتشيرو: لقيت هذي الرسالة عندي .. ودورت هيديكي بكل مكان مالقيته!!
ميتشيرو رجولها ماكانت تقدر تشيلها قعدت على الارض تصيح: هيديكي ليش تسوي كذا؟! ليش؟!
وجدان مسكت ميتشيرو بتساعدها : ميتشيرو يلا خلينا ندور عليه انا لازم اقول له مشاعري!!
ميتشيرو وخرت يد وجدان: انا ما اقدر اساعدك وجدان انا احبك وانتي صديقتي بس انا.. انا احب هيديكي واذا لقيته ماراح اقول لك عن مكانه لاني ما ابغاه ينجرح اكثر من كذا..
وجدان انصدمت ان صديقاتها تحب هيديكي مثلها واللي صدمها اكثر انها طول هالوقت ما كانت تدري,, وجدان تركت ميتشيرو بمكانها وراحت تدور عن هيديكي..
وجدان دورت طول اليوم عن هيديكي بس ما لقته .. رجعت البيت بس مالقت اخوها عرفت انه اكيد فقدها بالبيت والحين هو يدور عليها وانه لو لقاها يمكن يذبحها بس وجدان ماكنت تقدر تفكر من الارهاق والتعب اللي حست فيه اليوم.. وجدان بس حطت راسها على الفراش ونامت عقب اليوم الطويل اللي مرت فيه..
خالد لما رجع البيت ولقى وجدان كان ناوي يذبحها ليش انها قدرت تعصي اوامره اللي بحياتها ماكانت تقدر تكسر له كلمة بس وجدان تغيرت.. خالد لما شافها نايمة قرر يتركها مب بس لانها نايمة ولان خلاص بكرا رحلتهم وبيرتاح لما وجدان ترجع للسعودية...
وجدان حست بيد تهزها بكل طيبة واحد ينادي اسمها عشان تقوم ، فتحت عيونها بكل كسل وتعب
خالد: يلا وجدان قومي عشان رحلتنا بعد شوي
وجدان كانت تبغى تدف اخوها و تصارخ وماتترك اليابان لكن بداخل نفسها كانت عارفة ان كل هذا ماراح يفيدها وانها بترجع للسعودية..
وجدان سألت اخوها بكل هدوء: متى الرحلة؟!!
خالد: على ماترتبين عفشك ونروح للمطار بيكونون نادوا على رحلتنا ،، يلا قومي وتجهزي
وجدان كانت تحاول تتذكر وش صار امس والرسالة اللي حطها لها هيديكي وميتشيرو,, كانت تحلم؟؟ والا كل هذا صار بالواقع صارت تحس انها ضايعة وماتدري وش تسوي .. قامت من فراشها ورتبته وراحت تغسل وجهها وتفرش اسنانها وراحت ترتب شنطتها واغراضها عشان يمديها هي وخالد يلحقون على رحلة السعودية.. وجدان فكرت ترتب عفشها بكل بطء عشان تروح عنهم الرحلة بس بعدين وشو؟؟ اكيد اخوها بيرجعها بالنهاية .. وهي ترتب عفشها كانت الافكار تروح وتجي ..
اصدقاء وجدان بمدرستها المختلطة كانوا يدرون انها بتسافر اليوم ف شروا لها هدية واللي كانت عقد فيه ورود الساكورا = الكرز .. وخلوا راعي المحل يكتب “forever & always” = دائما وابدا .. يعني انهم بيتذكرون وجدان دائما وللابد
واللي عطت وجدان العقد كانت ايريكا زميلتها بالفصل وقالت لها انها منهم كلهم..
وجدان كانت مررة مبسوطة بالعقد واللي لبسته اول ماعطتها اياه ايريكا..
وجدان ضمت ايريكا : اريجاتو ايريكا واشكري كل الفصل وقولي لهم انهم بيوحشوني كلهم
ايريكا وهي تضم وجدان بقوة: اوكي.. باي باي وجدان بتوحشينا
خالد ركب السيارة وحط شنطة وجدان واغرضها ورا: احم احم وجدان يلا عشان نلحق الطيارة
وجدان لفت على خالد: طيب ثواني.... بعدين لفت على ايريكا: انوو (اممم) ماشفتي ميتشيرو؟؟ او..هيديكي؟؟
ايريكا : ميتشيرو تو كانت معي بس ما ادري وين اختفت،، اما هيديكي فما ادري له كم يوم ماجا للمدرسة
وجدان حاولت ماتبين انها متضايقة: جا (اجل) سايونارا ايريكا-تشان
وركبت وجدان السيارة واخوها بدا يسوق لكن سمعت صوت يناديها من بعيد
:وجدان !! وجدان!!!
وجدان لفت على مصدر الصوت من الدريشة وشافت ميتشيرو تناديها
وجدان: ميتشيرو؟!!
ميتشيرو كانت تركض عشان تلحق بسيارة وجدان: انا ماراح انساك ابد وجدان انتي كنتي وبتكونين صديقتي للابد
وجدان ابتسمت لميتشيرو ولوحت لها : اتاشي مو (وانا بعد) ماراح انساك وبكلمك دايما لا تغيرين رقمك
خالد ماكان ناوي يوقف لان ماباقي وقت على الرحلة ..
ميتشيرو وقفت من التعب وقالت بصوت عالي : لا تخافين ماراح اغيره!!!!
مطار كانساي الدولي..
وصل خالد للمطار هو ووجدان على الوقت ,, الرحلة لسى مانادوا عليها .. خالد راح يشحن شنطة وجدان بما انها كبيرة اما شنطته فما تحتاج لانها صغيرة وتنشال باليد عادي..
وجدان قعدت تنتظر اخوها بالكراسي وتناظر حوالينها كانها تودع اليابان
خالد نادى اخته لانهم نادوا على الرحلة وصار الوقت انهم يتوجهون للبوابة ..
خالد: وجدان متأكدة مانسيتي شي ؟! واذا نسيتي قولي لي يصير اذا رجعت هنا ارسله لك للسعودية
وجدان: لا مانسيت شي ..
وجدان وخالد كانوا يمشون للبوابة لما سمعوا صوت احد ينادي من بعيد....
: وجدان-تشان!! وجدان-تشان
وجدان استغربت وجود هالانسانة قدامها : وش فيه اكو-سان؟!
اكو وهي تبكي ومب قادرة تتكلم زين: و..وجدان-تشان
وجدان: اكو-سان ليش تبكين فيك شي؟؟
اكو: هـ.. هـ.. هيديكي هيديكي مااات!!!
وجدان نزل عليها الخبر مثل الصاعقة :هـ..هيديكي ..هيديكي مات؟!
ام هيديكي ضمت وجدان وقعدت تصيح ،، ووجدان تنحت بمكانها وماعرفت وش تسوي ,, هيديكي مات!! مات!! شلون مات ؟! ومتى؟! وجدان بدت تحس الدنيا تدور فيها وتسمع اخوها بس ماتدري وش يقول وماحست بنفسها الا وهي مغمى عليها ...
_____________________________________________
أسئلة البارت~
وش تتوقعون يصير على وجدان؟؟
وهل العنود بدأت تحب ريان؟؟؟
اي تعليق اضافي؟؟
آسفة ان البارت قصير نوعا ما .. لكن بارت بكرا او بعده طويل وراح يكون اخر بارت
ودمتم بود~
وش تتوقعون يصير على وجدان؟؟
مدري اكيد حـ تتاثر
وهل العنود بدأت تحب ريان؟؟؟
يب
اي تعليق اضافي؟؟
يا اخي البارت مـ مـ مـ مـزه بـ معنى الكلمة دمَميل و ربي
تحمست نزلي البارت الجديد يا دبَا طيب
مشكورة ربوشة .. تعليقاتك هي اللي تحمسني اني اكمل
واخيررراااااا
؟؟
~
العرض العادي
