وإنتهت " يا دنيا لا تسكبي الدمعة على خدِ حساس "

[To♥oma} ...]

وإنتهت " يا دنيا لا تسكبي الدمعة على خدِ حساس "

Tweet

لإزالة كل الأعلانات، سجل الآن في منتديات أنيدرا

واخيراً انتهت رواية " يا دنيا لا تسكبي الدمعة على خدِ حساس " .... آآآآه أخذت من عمري ثلاث سنوات .... شيء رائع .. احس بانجاز فضيع .... آيا , اكيرا , اندو , ماري , توما .... واضيف ساكورا اجمل شخصيات روايتي ..... عشت مع آيا ألمها وفرحها ومشاعرها وحبها الكبيــــــر ..... أكيرا الشخصيه اللي احبها كثــــــير الرومانسي المخلص الرائع اندو الحساس المذهل الشاعر .... اكثر شخصيه كان لها دور فعال وقلب احداث الروايه ماري يا حياتي هالمسكينه .... عانت بحبها كثـــــير لكن قدرت واخيراً توّصل حبها الكبير .... توما يا حبي لهالشخصيه .... كثير احبها ... شخص مرح وونيس ... وصديق رائع لاكيرا ...... ساكورا ... الضيفة الخاصه الرائعة واللطيفة ... آآآآآآه مرت علي اشياء واشياء في هالرواية .. في تأليفها وكتابتها وبعد تنزيلها .....

الموضوع الأصلي : وإنتهت " يا دنيا لا تسكبي الدمعة على خدِ حساس " || الكاتب : To♥oma} ... || المصدر : منتديات أنيدرا

[To♥oma} ...]

بدايةً كتبت كيف الفتها .... لكن من بديت تأليفها ..... اكتشفت موهبتي اللي ما قد حسيت فيها .. خفت انساها واقول يوم ..[ كانت من الماضي ] .... لكن الشكر الاكبر لحبيبة قلبي ونور عيني " امي " .. يوم قلت لها عن تأليفي ... قالت لي وبتشجيع ... اكتبيها ... مع ان بنت خالتي من قبل كانت تقول لي .. الا انه يوم قالت لي امي ... تشجعت وكتبت ...... سميت بالله وبديت اكتب ... روايتي قبل ما تكون على وورد ... كانت مرويه على لساني .. ودماغي حافظها ... كان حماسي في البداية كبيــــر .... بدأت في تاريخ هـ 1429/8/1.... شعبان ... استمر حماسي لرمضان .. وبدت الافكار تكثر وتكثر ... كتبت وصرت احاول اني اجيب كل شيء بالمنطق .... فكرتي الاساس كانت مبنية على شيء جداً بسيط ..... [ اكيرا ولد عز متواضع مع العاميه .... بنت عربجيه شوي وتبحث عن رفيق لها ... كيف راح يحب هالولد هالبنت ؟؟ هنا كان السؤال ... آآه البنت مجروحه من صاحبتها .... آآآه حلو تشكي له .. آآه بكذا يحبها... اعتراف قدام الناس والعالم .... وآآآه موقف خطيـــــر ..... اممم الابو يرفض ... آآه الولد مجبور على الطاعه ..... بس بس لقيتها ... الفراق .. بريطانيا .... ] هذي هي الافكار .... كان كيف ارتبها ؟ وش تحمل وسطها من احداث ؟ ... انا ما اقرى روايات .. كيف راح اكتب .... خليني اتجاهل واكتب والافكار راح تجي من نفسها ... شوي شوي طرت على بالي فكرة " ماري " ... كانت تغيير جذري لمسار الروايه ... بالرغم ان وضعها في ذاك الدور كان صعب ... الا اني حبيت دخول شخص غامض .. سألت توأم الولد كيف يكون .... بحثت عن الصحيح ... وطابق تفكيري .... انتقلت انه تخطر على بالي شخصيه " اندو " ... كان دوره جداً جداً صعب .... لكن فكرت كيف يمكن تكون شخصيته ؟ .... آآه حساس ... شخص رائع .. شيء حلو .. وبديت بالافكار حوله .. آآآه كيف يمكن يكون الفراق ... بس بس اندو يقع في حب آيا ..... وقتها ... كنت افكر ... انا ما بعد كتبت عنوان للرواية ..... آآه انا غبيه ... كل من سألني عطيته موجز من الاحداث بدون عنوان ... غباء خلاص لازم اسميها .... جلست افكر وافكر .... اول شيء خطر على بالي كان (ما اضمن لك الايام اضمن لك احساسي لو نفترق اعوام ما يموت اخلاصي ) واااااه وش هذا .... نو نو نو ابي الموضوع يكون غامض اكثر ..... حضرت عرس وكانو يغنون ( ابي حبك معي يكبر ) .... بس بس واخيراً لقيت العنوان ... الا والقى وحده كذا اسم روايتها ... جلست افكر مره ثانيه ..... سألت اختي قالت ( امبروطورية الحب ) .... قلت وااااااه اسم فضيع ..... قلت خلاص اوكي .... مشيت على ان هذا اسمها .... لكن بعد ما تعمقت في شخصيه اندو ... بغيت يكون شخص شاعري .... وكلامه حلو .... سمعت انشودة ( يا قلبي لا تشكي همومك على الناس ) ..... تأثرت بها وعجبتني كلماتها .... حسيت انها توصف اندو كثـــــير ... وفجأه قلت ( يا دنيا لا تسكبي الدمعة على خدِ حساس ) ... قررت وبنيت كل الاحداث حولها ... بعدها .... اممم كيف آيا تقابل اهل اكيرا ؟؟ .... آآآه تصير دكتوره .. الله شيء حلو .. آآآآه كيف اصعب الامور واخليهها ما تملل ..... بس بس .. خطيبة لاكيرا .... لا لا لا تصير مثل هانا يوري دانجو .... بس لحظة ... لا لا ما راح اخليها مثلها ... الافكار شوي تتطابق لكن الحدث من عندي ..... اوكي اوكي خليني اواصل .... اوووه حلو خليها صديقة اندو القديمه وكانت تحبه ..... وااااه شيء حلو ...... طيب طيب ...... امممم ورطت نفسي يوم خليت اندو يحب آيا وآيا تبادله .... يا ربي وش اسوي بخبالي هذا ؟ .... لحظه ورا ما اخلي اندو تنقلب شخصيته على آيا ..... امممم كيف ؟ .... ما عليه مشيت الموضوع بعد معاناة .... امممم ماري من اخليها تحب ... بس بس لقيتها .... عشان آيا تيأس وترجع لاكيرا .. ماري تحب اندو ... زيـــــن واخيراً حلينا المشكله ...... وبكذا وكذا وكذا .... مشيت على الافكار والكتابة وانهيت الكتابة بعد ما جتني حالة ملل وضغط وصبر وعصر مخ .. 1430/10/16 هـ 5:14 ص ... آآآه وقتها كان في اسبوع الاجازه من الملك بعد الاجازة الصيفية عشان ( وباء انفلونزا الخنازير ) ... كان الفجر ... وقتها كنت ابي ارقى للسطح واصرخ باعلى صوووت فرحة بانتهاءها .. كنت حاطه مع نفسي عهد ما تبدأ السنة الجديده الا وانا مخلصتها ... والحمد لله حققت ما بغيت ...

[To♥oma} ...]

صحيح انا نزلت الرواية هنا في يوم الاربعاء 15-07-2009.... كان وسط الاجازه نفسها ... آآآآه بغيت احكي هنا عن كل شيء ... ابي اطلع كل اللي في خاطري ... ابي ابداها في حالة تأليفي لها .... في تأليفي كانت الظروف اللي حولي تساعد في الاحداث ... واقرب شخص كنت اروي له الرواية واشاوره في الاحداث .... واطبق عليها .. هي ... بنت خالتي .. " أميرة ".. كانت تعيش معي كل الاجواء .... وبعد اذا ما عرفت اوصف موقف او شيء .. اوقفها قدامي واحط نفسي انا اكيرا مثلآ وهي آيا ونطبق الصوت وكل شيء ... اللي اذكره اكثر شيء ... كان اعتراف اكيرا لآيا في زواج اخوه ... وقفتها قدامي وجلست قدامها ومسكت يدها وقلت النص نفسه ..... كل هذا عشان نعيش الجو .... وقتها قالت لي اكتبيها كان في عام 2008شهر 7 .. كنت يؤوس مره وعجااااازه مع مرتبة الشرف ... لكن في شهر 8 قلت باجرب حظي وبديت اكتبها ..... آآآه ايام التأليف والكتابه نفسها .. كنت امر باشياء كثيــــره خصوصاً انه ما كان عندي نت ... فكنت احط حيلي فيها .... لا يمكن انسى استاذه علم النفس طقيت معها صداقه .... والسبب اني كنت ابي مرض نفسي يقلب شخصيه الشخص ... كنت ابحث حول الغدة الصامته في الدماغ .. لكن مع الاسف قالو لي ان العلماء ما تأكدو من المعلومات .... رحت لها ... كنت ابي حدث حول اندو عشان تتغير شخصيته على آيا ... قالت لي اشياء صعبت علي الامور اكثر ..... قالت خليه يكون مدمن مخدرات ... قلت اخاف متابعيني يقتلوني قتل ... قلت شيء ثاني ... قالت انفصام شخصيه .... قلت نو نو نو ابيه بعدين يرجع طبيعي .... قالت ما قدامك غير فقدان الذاكره ... قلت ابيها ترجع له .... قالت خليه جزئيه .... يمكن ذاك البارت كتبته ومسحته 7 مرات هذا اقل شيء .. الا اني خليتها في النهاية ذاكره جزئيه .... الحمد لله فكينا العقده ... لكن انصدمت يوم قالت لي الاستاذه الكريمه انها تبي تقرا الروايه ... قلت في نفسي ..... ههههه في احلامك يا قلبي اخاف اطيح من عينك على هاليابانيين ... اقول خلونا بعيدين عنها اصرف .. على العموم اصلاً علاقتي بها جداً سطحيه ولا كلمتها ابداً بعد ذاك الشيء << مصالح .. كنت اسأل صديقاتي ..... اي نوع من الروايات تحبون ؟ ... جاوبو لي بالرومانسيه .... وقتها انا رحت فيها ... لان الرومانسيه ما تدل بيتي ... قلت احاول ... يله يله نحاول .... في البداية كانت عاطفية اكثر شيء ... قلت الناس بنقهر من المشاعر المنغلقه لازم افجرها ..... واصلت وواصلت وقدرت اني امشي الاحداث شوي .. مع اني الحين اتلقى كلمات من صديقاتي اللي يتابعون كنها كفوف ... اكثر شيء ارتفع ضغطهم عليه ... يوم آيا كانت تذاكر مع اكيرا في بيته ونامت ... انا حطيت المشهد انه يوم رجع بالعشاء بس غطاها ورجع يذاكر ... هم انفجروا غضب .... ليه ؟ ... قال ايش وش هالبرود ... رديت عليهم قلت يا بنات الولد بكره عنده امتحان نهائي هو فاضي لها ...... عقبها عطوني كفوف على المنطق الزايد اللي فيني .... قلنا يله اعذرونا عسانا بعدين نرضيكم ..... في خيالي .. مو الحب يكون بكلمة احبك بس ... او انه يتغزل فيها ومن هالناحية .... انا بانية الحب بالتضحية ... حسيت ان هذا الحب هو الاقوى ... قال احبك .. ردت له الكلمه في اصعب الاوقات .... هنا نقدر نقول اننا نعني كلمة احبك .... هنا تقريباً كانت الفكره ..... ... الحين نروح للكتابة والتنزيل في الوقت نفسه ... كانت على نهاية الترم الثاني ... كنت افكر ...... يوووه اللحين روايتي الى الان ما لها نهاية ... متى ناويه انهيها وبايش انهيها ؟ .... كنت غارقه في تفكيري .... مرت علي كم نهاية .... اولها كان الزواج ... قلت خلاص يتزوجون وننتهي .... ثم قلت ... امم العيال ... ثم قلت .. يوووه واندو وماري وش اخلي نهايتهم ؟ .... مرت الافكار اشياء واشياء والله ما اذكرها حتى .... ثم سألت اختي ( مدمنة روايات ) .. وش احلى نهاية في نظرك ؟ .... قالت اهم شيء ما يموتون .... قلت طيب .. قالت ..... امم يجيبون عيال .... قلت يعني جوا الروية يعرسون ؟ ..... قالت اصلاً هم معرسين من البارت الثالث ... تقصد روايتها اللي تقراها .... قلت نو نو نو ... ساعديني ... قالت انهي الامور كلها ... وحطي النهاية اللي الكل يتمناها .... قلت فيه خيارين .. يا اما زواج وانتهينا ... او زواج وبعده عيال .... قلت لا لا خلي الناس تبني الافكار من عندها .. وخليه بس زواج ... قلت خلاص اجل قررت ... واخيراً يتزوجون ...... كيف تكون ؟ ... آآآآه مشاعر .. احلى من التطبيق ... بس وصف ... جلست انا وصديقاتي اسألهم ... وش تبون احلى نهاية للزواج ؟ ... قالو خلاص قلتيها زواج وانتهى الموضوع ..... قلت ابي كلام مصفوف ويكون شاعري .... على العموم ما فادوني الا بالضحك والتأليف الغبي << كف من سديم .... رحت لوحده من صاحباتي معروفه ما شاء الله بالكلام الزين .... جلست معها وقلت اني ابي اسوي كذا مشاعر ... قالت انا ما اعرف الرواية عشان االف لك كلام ... يأست وجلست لحالي افكر .. بديت اكتب على الورقه شوي شوي وطلع معي الكلام الزين .... رحت لها مره ثانيه وقلت شوفي كلامي زين .... اضافت لي بعض الكلمات اللي تعطي مشاعر اكثر .... واخيراً كتبت النهاية ... عافاك ربي يا " رنا " على المساعده الحلوه ما راح انساها ... خلاص بما اني فكرت في النهاية بدنيت الامور عليها .... ثم فكرت ..... الله من السماجه ان ابو اكيرا يسوي كل هالحركات عشانها عاميه وجع على غفلة مو من البشر ... قلت لا لا خليني اخلي الموضوع اعمق اكثر ... وسويت قصة المذكرات وام آيا وساسو اللي خاشه عرض ... لكنها والله كانت هي النجاة الحقيقيه للوصول للنهاية .... انتهى كل شيء على هالمنطق .... في بداية هذا العام قلت لازم اسوي ترويج للرواية بين الطالبات ..... طبعت من الرواية الخمس فصول الاولى ... واخذتها معي ... اول شيء عطيتها لصديقاتي ... ثم بدت كل وحده تاخذها بعد الثانية ... شوي شوي ولا صرت اعرف وين وصلت ! ..... وكل ما خلصت وحده من قراءة البارتات تقول لي وين الباقي ؟ ... انا هنا ابدأ بالترويج المطّور ... واقول لهم ... ادخلو على النت هناك التكملة .... كذا كان ترويجي والحين البارتات توها ترجع لي .... كسبت من صديقاتي جمهور يشجعني ... واصلوا معي الى النهاية ... وكمان ما قصروا خلو اقاربهم يتابعون واخواتهم كمان ..... هونتوني اريجاتو تومويا تتشي ...

[To♥oma} ...]

الحين انتقل لوقت التنزيل هنا ... بدايةً يوم دخلت قسم وحي القلم ... قريت علطول عنوان ( عشق بطعم الدم ) للمؤلفة غادة ... دخلت وشفت افكاري قدامي مكتوبه ... جتني حالة خيبة شوي وقلت اخاف يقولون لي اني مقلدتها ... ثم قلت .. بس انا حقيقي ما كنت ادري عن هالشيء ... حتى ان فكرة وضع الممثلين في الشخصيات بالضبط نفس مسار تفكيـــري ... رحت ازور بنت خالتي " اميره " يوم الاثنين وقلت لها عن هالشيء .... قالت لي اجل لا تطولين نزلي روايتك يوم الاربعاء الجاي .... بكذا تكونين مو مقلده .... قلت بهالسرعه ؟ .... قالت .. روايتها غير وانتي غير ... دخلت لرواية غادة قريت من بدايتها .... حبيت كتابتها كثيــر انها كانت حاطه باللغة العربية وفيها ياباني ... قلت صحيح انا غيــــر .... انا بلهجتي .... قررت وزينت التصاميم وكل شيء يوم الثلاثاء واطلقت اول جزئين يوم الاربعاء .. كنت افكر كثيــــر .... هل بيكون لي جمهور ؟ ..... آآآه اللهجه يمكن تكون عائق للامراتيين والقطريين .. آآه لا اهتم كلامي واضح ... كانت تجيني تخيلات انه ما راح يكون لي جمهور ويروح تعبي كله هبا .. لكن بالعكس استقبلت اجمل الردود والتشجيع من اول بارتين .... حسيت بالحماس وقلت الحين الانطلاقه .... مرت علي احوال كثيره لي في التنزيل ... اولها من تركي للتنزيل في رمضان .. قلت الوعد وعد .. وراح ارضيهم بعد هالشهر الفضيــــل ... وبالفعل رجعوا لي متابعيني وكأن شعبان كان الامس .... واصلت وكثر لي جمهوري ... حسيت بالفخر وقلت ما ابي اخسر احد ... بعدها ... قررت اقدم لكم الهدايا وفي المناسبات اعطيكم بارتين ... واصل معي جمهوري العزيز الى نهاية الرواية بعد ما اخذت من عمرهم سنه الا شهرين .... صحيح .... جلست انزل الرواية سنة الا شهرين .... مده طويله .... لكن كانت ممتعه .... حبيت الجمهور ... ردودهم وحماسهم وتعليقهم كانت ترسم البسمه على شفاهي ..... وشيء افخر به .... ان روايتي تثبتت بعد نزولها بشهر .. واستمر التثبيت الى خمس اشهر .... فخر .... حققت اشياء كثيره فيها ..... كنت في تنزيل كل بارت وتصميمه .... افكر بس في شعور جمهوري .... خلونا الحين نتذكر بعض البارتات اللي مرت ..... حتى ولو كنت الكاتبه يبقى لي تعليق وهدف ... [ نبدأ الفصل اللي اشتكت آيا فيه لاكيرا ] كان شيء صعب ان الشخص ينخان من اعز اصدقاءه ... المشاعر مجرد اني افكر فيها احس انا بالالم .... كان كذا .. انها تبكي على صداقتها كان هذا الشيء يرجع علي كثيــر .... يمكن احد منكم فكر او مر عليه مثل كذا موقف .... ان يكون لك شخص مستمع لشكوى انت متألم منها .... احب هذا الشعور .... احب هذا الشخص ... كل واحد منا مهما كتم راح يبحث عن شخص يفجر له كل ما يحس فيه .... هذا اللي حبيته في هذا البارت ...... [ في بارت اعتراف اكيرا لآيا في زواج اخوه ] ... كان المشهد الاحب لي كبداية الحب .... الترقب من اكيرا لآيا وردة فعل آيا المنطقيه ... كانت مشاعر صادقه ... وبعد حبيت في آيا قوة الشخصيه ... انها كانت قويه قدام البنات اللي حاسوها في الزواج ... صحيح بكت في النهاية ... لكن هيبتها قدامهم باقيه .... هالبارت سويت فيه خبال مو طبيعي ..... تتذكرون نزلت لكم صور فساتين وقلت يله اكشخوا وروحوا للعرس .... وكمان انا وبنات خالتي ( نكاتسو والنعم و اختها اميرة ... كانوا عندي ... طلعت من عندي فستان وردي ولبسناه لـ نكاتسو والنعم .. والجزمه والشنطه والمكياج مره مره خليناها من جد الحين بروح بحق وحقيقي ..... ولا كملناها بعد انا لبست بنطلون اسود وكشخت بالبلوزه على اني انا اكيرا ..... صورنا سوا للذكرى وانوااااع الخبال في ذاك اليوم .... [ في بارت عودة ماري ودخول اكيرا للمستشفى بسبب آيا ].. كان شعور قوي .. هي ما قالت له مشاعرها الحقيقيه وكانت خايفه تفقده ... كلمة احبك لآكيرا وقتها ... كانت بمعنى الحب .. خليت آيا تنطقها بدون ما يطلب منها هذا الشيء ... هذا هو الحب .... [ بارت اللي راحت آيا مع اكيرا للملاهي ] وخيرت اكيرا بين الثلج والمطر .... كانت واخيراً بداية مشاعر من آيا لاكيرا ..... [ وتكرر السؤال على اندو في بارت الينابيع الحاره ] .... بدت تطلع شخصيه اندو مع آيا .. وتطور الموضوع بعد هذا الى حب .. كان اكتشاف اندو لآيا واعتقاده انها مخادعة احد الاحداث اللي تظهر اهتمام اندو لآيا .....في نفس هذا اليوم نزلت البارت وسافرت لمحافظة قريبة من الرياض ... هناك امطرت ... ياااااه كان الاحساس جداً حلو .. البارت كان مناسب جداً للجو اللي كنت اعيشه ... وكنت مع مكالمة لبنت خالتي اميره .... قلت لها عن هالشيء ... البارت نزل فيه المطر وتكلم آيا عن هالشيء ... وانا اعيش هالجو عشان اعرف هل للكلمة في وقتها اثر ؟ ... كان شعور جداً حلو ...[ بارت الكريسماس ] كان بارت غريب بحق ... لاني نزلته بالصدفه في نفس يوم الكريسماس ..... ما كان ودي ابداً هالشيء ... لاني ما اتابع شيء اسمه كريسماس غير انه عيد للاجانب ...[ بارت فراق آيا واكيرا ]... هذا البارت قريته حوالي خمس مرات .... اول شيء كانت كتابته وكيف يكون حماسي .... بعدها قريته واضفت الكلام الزين ... ثم قريته وقلت خلاص كذا بيكون حلو ... ثم بعدها قريته واضفت جو اكثر حماس .... يعني هذا البارت تعذبت معه ..... بس كنت كثيـــر احبه ..... وتحمست لكم فيه كثيـــر ... كان بيكون وقت تنزيله في وسط الامتحانات النهائية للترم الاول ... لكن ما نزلته لكم وقتها عشان ما ابي اشتت افكاركم وافكاري ..... وخليته هو وبارت التخرج مع بعض ... جاء الحج وحجيت هالسنه وخليت بنت خالتي " نكاتسو والنعم " هي اللي تنزل لكم البارت ... ما بغيت اقطع بكم ابداً وخصوصاً وقت اجازة .... واصنا مع بعض المشوار .... وصلنا للفصل11 ... كانت بارتاته كلها مشاعر واحاسيس من آيا واندو ... وفيه حبت آيا اندو .. [ اتذكر فيه كانت سالفة الخطوبة ] ... يوم آيا كانت تنتظر اكيرا بكل شوق له في موقع الالعاب النارية .... حبيت هذا البارت ... كان احساس فضيع مره ... انها تعتقد انها راح تقابل اكيرا ويطلع لها اندو ويقول ان اكيرا في بريطانيا .... كان الالم في داخلها كبيـــــر ..... صح انا كنت حاطه ان آيا كانت تغني وهي تنتظر ..... كلمات هذيك الاغنية خلت الجو اكثر مشاعر ... ما ادري اذا كنتوا تتذكرونها ... او بعضكم ما قراها .... اقتباس للاغنية :: لكن ترجمتها احسن .. [ آيا وهي ملت الانتظار وحاطه راسها على ايدينها وتطل على المدينه : تعبت كثيراً من وجودي هنا .. خُمدِت بكل مخاوف طفولتي .. وإذا كان عليك أن تغادر ... أتمنى لو انك غادرت فحسب .. لأن وجودك ما زال باقي هنا .. ولن يتركني وحدي .. .... يبدو بأن هذه الجروج لن تشفى .. هذا الالم حقيقي حقأ .. هناك الكثير من الوقت الذي لا يمكن محيه .. .... عندما بكيت مسحتَ كل دموعي .. عندما صرخت حاربتَ جميع مخاوفي .. وأحتضنت يدّي خلال كل هذه السنوات .. ولكنك ما زلت .... تمتلكني كلياً ... ...... اعتدت على ان تأسرني .. بصدى حياتك .. والان انا مقيدة بالحياة التي تركتها خلفك .. وجهك يطارد أحلامي الصافية .. صوتك طرد كل سلامة عقلي بعيداً ... ..... يبدو بأن هذه الجروج لن تشفى .. هذا الالم حقيقي حقأ .. هناك الكثير من الوقت الذي لا يمكن محيه .. ....... عندما بكيت مسحتَ كل دموعي .. عندما صرخت حاربتَ جميع مخاوفي .. وأحتضنت يدّي خلال كل هذه السنوات .. ولكنك ما زلت .... تمتلكني كلياً ... ...... حاولت جاهداً ان اقول لنفسي أنك رحلت .. لكن برغم ذلك ما زلت معي ... لقد كنت وحيدة طوال الوقت ... ] هذي كانت الاغنية .... حبيت هذي الاغنية كثير لانها وصفت الجو اللي كانت آيا عايشته لثلاث سنين من الفراق ..... كان شعور مؤلم كثيـــــر انها ما قدرت تقابله وقتها .... [ في الفصل الثاني عشر ] ... كان وقت حب ماري لاندو ... بعدها آيا حاولت انها ما تفكر في اندو ابداً .. كان فقدان اندو للذاكرة الجزئيه مؤلم لكل البنتين اللي حبوه ... لكن من خلال هذا الشيء ... قدرت ماري تظهر حبها الكبيــــر .... [ دخول ساكورا المفاجئ لحظتها ] ... وانها تقول انها راح تتزوج وقدرت ماري تعرف انها هي المقدره لاكيرا ...... كان صعب على ماري تحمل هذا الشيء لحالها .... خصوصاً ان اندو ما يقدر يساعدها ولا تقدر تقول هذا الشيء لآيا ..... موافقه اكيرا من الزواج كانت صدمه كبيره .. اعتقد حتى المتابعين انهبلو من هذا الشيء ... والصدمه الاكبر ان ساكورا خلت آيا تشوف من هو ابو زوجها المستقبلي ... كانت الصدمه قويه مره .. ما قدرت تتحمل الموضوع ... تبعها اندو بالرغم انه كان فاقد الذاكره ... كان صراخها والمها في المطل يضيق الصدر .... يعني عقب هالسنين من الانتظار تسمعه بشكل مفاجي ..... تذكر اندو لآيا في ذاك الوقت ... كان افضل وقت .... لان كل من آيا وماري كانوا في حاجته .... طلب الزواج من اندو لساكورا اعتقد كل الموجودين هنا كانوا منصدمين من قوة الكلمه .... لكن هذا الشيء اثبت حبه الكبير واخلاصه لصاحبه بعد .. [ مقابلة ساكورا لاكيرا وبرود تعامل اكيرا معها ] ... حط للجو بينهم اثاره وتحدي .... من راح يتنازل .... هذا كان السؤال ؟ ... رفض ساكورا لاكيرا .... كان انتصار كبيــــر ... وهو اللي فك الازمه .... اعتقد ان المتابعين وقتها قالو .. واه واخيراً .... هههههه ..... ما ادري يمكن ردة الفعل مختلفه ... دخول ساكورا بحد ذاته كان اثاري كثيـــــر ... واثبت الحب اللي يبقى بعد الفراق والسنين ... كلام ساكورا لآيا عشان تعلمها ان اكيرا ما زال يحبها ... صياح آيا بفرحه انه ما زال يتذكرها ومخلص لها .... كان شعور ما يوصف ... بذل جهد آيا في الامتحانات عشان البعثه ..... كانت قوتها الاكبر للوصول له ... [ آآآآه التقاء آيا واكيرا ] ..... يا انا احب هالبارت .... كنت احس بالحماس للقراء له .... كان التقاء رائع ... بعد ست سنين كل واحد يبكي للثاني بشوق ... آآآآه بس ما اقدر اوصف اعجابي ..... هالبارت قريته يمكن تقريباً ثلاث مرات .... لحاق اكيرا بآيا في المطار عشان ما تعتقد انه تركها .... كان احساس حلو ... وتغيير للفكره .... واخيراً ... بعد مرور الوقت مع اكيرا في بريطانيا وترجع الحياة حلوه ... [ يوم الفلنتاين ] .... كان مشوار طويل ورائع ....... ومفاجأت اكيرا لآيا من فوق البرج ... آآآآه هذي الرومانسيه ولا بلاش .... جاب لها المكان اللي تتمناه ... وصحيح ... كلام آيا الشاعري لاكيرا ... كانت كلمات معبره ... تعطي الاحساس نفسه ... مرت اشياء واشياء والله ما اقدر احصرها ... لكن انهيها ... بالرقص الثنائي في نهاية الرواية ..... واقول واخيراً اجتمعت الشله مع بعض ... وكل واحد معه زوجته المستقبليه .... شلة الثانوي كبرت .. واخيراً تحقق الحلم وعاش اكيرا مع آيا حياتهم بعد هالمعاناة ...... مثل عبارة آيا .... (قصتنا لم تنتهي هنا ... فقد كانت هذه الليله بداية رحلة أصطحبتها ذكريات الماضي ........ ) صحيح الرواية والقصه توها تبدأ .... الحياة السعيده ما لها نهاية اكيده .... لكن من هاللحظه تبدأ حياة جديده ... وكذا اكون كتبت كل احاسيسي بالرواية ...... يمكن يكون الكلام مره كثير وقرقرتي كثيره .. لكن انتم مو مجبورين للقراءه ... فقط هذي احاسيس الراوية نفسها ....

[To♥oma} ...]

ابي اروح لفقرة ثانية من الموضوع :: العلاقات واخيراً اكتملت :: .... والدوائر كلها مليانه .... دوزو