في نفسي : الحين كانت تنطر لين ما انزل من الدوام عشان توهقني وياها في المول ؟!
انا : زين زين ... رايحة تلعبين بس ولا رايحة تتشرين حق المدارس ؟
نورة : الاثنين ... وامي طالبة طلبات بعد !! .. بروح اشتري لها بعد ؟!
انا: ان شا الله .. ركبي السيارة ... ولا تسوين حشرة ..
ركبنا السيارة وتوكلنا على الله ...
وفي الطريق ...
انا : امج شو تبى من المول ؟ ..
نورة : قالت تبي كريمات وهالشغلات ....
انا : انزين ... وانتي شو تبين .. ؟
نورة : ابى شنطة واقلام ومسطرة ونوتز ودفاتر وملفات ومقلمة وجوتي رياضي و نعال وزليقات
وشباص و شيلة بيضا و جلاد و مقص والوان خشبية ومائية وادوات هندسة و ...
انا : ما شا الله ... عسى بس تكفي فلوسج ...
نورة : اي فلوس ... ما عندي فلوس ...
انا وشوي كنت بروح فيها ... : نورة عن الغشمرة ... اكيد ابوج عطاج فلوس عشان تتشرين ..
نورة : لا ما عطاني ... عبالي انت بتعطيني ..
انا : نورة ... حرام عليج لا اتسوين فيني جيه ..
نورة : خااالوه .. ما هاين عليك تشتريلي .. ؟!!
انا : لا خلاص بشتري لج .. ..
في نفسي : عسى بس يكفي فلوسي ... باخذ قرض من البنك احسن ..
وصلنا المول ... نورة راحت تلعب في طابق الالعاب ... وتركض مني مناك .. وتروف فوق وتحت
وانا احاول اروح وراها ... خلتني اركض وراها .. خبلت بي هالبنية !!
حسيت بعد كل الركض ... اني خسيت ... نص وزني ..
اللي يبى ينقص وزن يروح يحاوط مع اليهال في المول ...