جـــن في جامعة الملك سعودo_O
لإزالة كل الأعلانات،
سجل الآن في منتديات أنيدرا
بسم الله الرحمن الرحيم
الموضوع باين من عنوانه .. اليوم راح اقولكم الموقف الذي هز جسدي و اقشعر له شعر كشتي .. اليوم راح اشارككم موقف للحين والله كل ما تذكرته احس ببرووووودة من الخوف ..
نخش في الموزوع ..
اليوم/ اخر يوم امتحانات نهائية
التاريخ / ما اذكر تحديدا لكنه كان بشهر 6 عربي السنة اللي فاتت
المادة( مدري وش دخلها ) / writing
الأحداث ..
كان امتحاننا المشؤوم من الساعة 1 لـ 3 العصر .. ويوم امتحنت وخلصت قلت اروح لمكتب الاستاذة أشوف كم درجتي حقت المشاركة ..
الاستاذة كان مكتبها في آآآآآآآآآخر دور فوق ( الدور الرابع ) .. و وين ؟؟؟
جنب الحمامات الله يعزكم ..
رحت للدور الاخير بواسطة المصعد ويوم فتحه بابه الين مافيه أحد .. أبد أبد ..
أنا بصراحه من يوم وطت رجلي الدور هذا وأنا موب عاجبني هدوءه ..
المهم اني رحت لمكتبها وطبعا مشيت في سيب طووووويل لين وصلت له ..
يوم وصلت له ..
إلينها معلقة ورقة الدرجات عالباب .. شفت درجتي .. قمت قلت قبل لا أنزل بخش دورة المياة أضبط شكلي بالمراية ..
المهم أن دورة المياة ما فيها الا 3 حمامات الله يعزكم وكلها مفتوحه .. أنا شفتها وما فيها أحد .. ولا واحد منها ..
دورة المياة أصلا صغنطوطه .. يعني لو فيه أحد يمديني شفته بسرعه ..
وانا قاعده أتأمل بخشتي في المراية .. جا في بالي آخذ درجة صديقتي .. قمت طلعت من دورة المياة ووقفت قبال مكتب الاستاذة ..
خذت رجة صديقتي و قلت ليش ما أرسلها لها sms .. وانا قاعدة أرسلها سمعت صوت ضحك .. o_O
من وين جاي ؟؟؟ من الحمامات ..
المشكلة ان الحمامات لازقة بالمكتب يعني وراي بالضضضضبط ...
أنا واقفة بين الحمامات وبين المكتب .. ولحالي في الدور كله ومحد فيه ..
أنا لسا ما استوعبت المسأله .. قمت قلت خلني أطل أشوف .. مسوية يعنني ..
ولا لقيت أحد .. الحمام فاضييييي ...
ما سميت بالرحمن لأني ما كنت متأكدة .. ولا كنت أبي أقنع نفسي انه في شي ..
المهم وأكمل كتابة الرسالة وأنا قلبي يرقع .. شوي .. إلا وأسمع نفس الصوت .!!!!
صوت ضحك بزران .. جاي من الحمام ..
إلا وأقول يا mj وش رايك تحطين رجلك بس ..
واطير في السيب وأنا قاعدة أسمي بالرحمن ..وبسرعه ضغطت على زر المصعد والحمد لله فتح على طول ..
و أدخله وأضغط عالدور الأرضي .. بس بيني وبينكم خفت أنه فيه شي يطلع قدامي قبل لا يتسكر الباب .. ويوم تسكر قسما بالله أنا عيني بس فوق قاعدة أناظر الأرقام حقت الأدوار ابيه يجي صفر .. 4 3 2 1 وقف ..
أنا انصرعت حسيت ركبي خلااااااااااص طاحت .. يوم فتح الباب ..
ألاها استاذة تبي تنزل تحت .. أنا قعدت ادعي عليها .. لعنبو دارك الدور الأرضي تحتك على طول كان انقلعتي نزلتي مع الدرج يا عجازة ..
المهم انها دخلت ووقفت جنبي .. أنا حسيتها تقول شفيها البنت وجهها أحمر وترجف .. شكت فيني .. خصوصا انه لما وصلنا تحت وتوه فاتح باب المصعد الاني طايره اركض لين وصلت البوابه ..
والحمدلله .. وصلت لبيتي بالسلامة
وبس !!
** الحادثة كلها صدق ولا فيها اي مبالغة من اي نوع **
الموضوع الأصلي :
جـــن في جامعة الملك سعودo_O || الكاتب :
M.J Corleone || المصدر :
منتديات أنيدرا