[04]
وصلني تقييم من أنجلينا و جيورين إلي بصراحة أشكرها على كلامها الحلو إلي يرد النفس بصراحة! وبالمثل لخواطر.
اليوم خطر ببالي أتكلم عن أول كورس صيفي أخذته، تدرون إنه كان بالمدرسة؟ لأن نوعي أحب أجرب كل شي فجربت آخذ
كورس صيفي يوم كنت بثالثة ثانوي، كان نظامنا وقتها يشبه الجامعة -نظام مقررات- و كان أربع سنين (لأن وقتها الابتدائي
أربعة و المتوسط أربعة و الثانوي أربعة). فكنت ماخذة مقرر كيميا 2.
الدوام كان ساعة وحدة على ما أذكر أو ساعتين؟ مادري بس أظن ساعة المهم إن الدوام كان 6 أيام بالأسبوع ولمدة شهر،
وطبعا كان بغير مدرستي و كانو الطلبة منوعين من أكثر من مدرسة وبالمثل للمعلمات، بس من حسن حظي إن إلي تدرسنا
كيميا كانت إهي نفسها رئيسة قسم الكيميا و الفيزياء بثانويتي الأساسية، و كان معاي بالمقرر كذا طالبة معاي من نفس
المدرسة بعد، كان مقررنا بلاب (كعادة المواد العلمية)، بس الي لاحظتها إن كل بنات من نفس المدرسة يقعدون على طاولة
وحدة! هذا لأن بني البشر حتى لو ما إرتاحو للي معاهم بيرتاحون معاهم غصب لا صاروا مع ناس غرب، لا قلت إن بني آدم
مالهم إلا بعضهم ورب واحد يعرف لهم!
المهم إن وقتها كان "حر!" بكل ما يعنيه هالحرفين إلي شكلو كلمة أكبر منهم ورفعت إستهلاك الكهربا بكل الدول تقريبا!لا
تحسبون كلمة من حرفين هينه =\! وغير إنه حر كان دوامي وقته حلو بصراحة! أداوم الصبح أظن 9ونص؟ أو 10؟ يعني حتى
مو مبجر. و الحلو بالموضوع إن المدرسة يديدة فكان مرات أحوس عشان أقارنها بمدرستنا! لا صار الواحد فاضي بعد لازم يحوس!
بوحدة من فراتي بمدرستهم، وصلنت لورشات مادة الصناعي، وكان بوسط الورشة من أكبر أعدائي ومن أشد كوابيسي رعبا
ألا وهو المنشار الكهربائي إلي يقطع الخشب! تعرفونه؟ المدور ويدور يدور وانت تحط الخشب و أهو يقصه؟ إي هذا أهو وأنا
أطالعه مستغربه إنه مسموح عندهم..شوي ولا يرقع الباب الحديد إلي وراي فركضت بسرعة خاصة إني بروحي وما يسوى
علي يطلع لي واحد مخبول مثل إلي بفلم سو! ومن عقبها ما صرت أحوس بمدرستهم.
بس كانت تجربة حلوة بصراحة حبيتها بشكل، عشان جذي صرت آخذ صيفي بالجامعة، حتى شلون ظفت مواد الكورس الصيفي
يوم كنت بالثانوي كان تجربة تونس، كانو حاطين الإضافة بهذي المدرسة الثانية و حاطين طاولات كبار بصالة الرياضة،وعلى كل
طاولة اسم المدارس إلي بمنطقة حولي. وتشوفون أولياء الأمور و الطلبة يسجلون جداولهم، أنا كنت نازلة بروحي يعني ينقالي
بعتمد على نفسي ألحين، المهم رحت للطاولة إلي عليها اسم مدرستي وقلت لهم بسجل المادة الفلانية قالت لا مايصير
إلي "شلون يعني؟" بعدين صارت "مغلقة الشعبة ومتروسة.." إلخ من الحجي الطويل العريض إلي ليته ينفهم ولا بفايدة!
ويوم إستسلمت قلت شكله مايصير صيفي، شوي ولا وحده أعرفها قالت ماعليج قوليس لهم أبي الورقة و هناك القسم
يضيفج، وبالفعل سويت إلي قالت عنه و ضافوني ومثل ما ذكرت مسبقا كانت تجربة رائعة. عاد الفرق بين الجامعة و الثانوي
إن بالجامعة التسجيل إلكتروني =).