ياالله ....
اشتقت لكل زاوية ولكل عضو بالمنتدى ، طمنوني عنكم إذا مريتو مدونتي
من كم يوم طرى على بالي المنتدى وحسيت إني مشتاقة له حيل قلت خليني أحوط فيه
مريت بملفات صديقاتي كلهم وصرت أبحث عن محادثاتنا واسترجع ذكرياتي اللطيفة معاهم ، بس للأسف أكثرهم آخر ظهور لهم كان قبل سنوات يعني تقريبا 2011 أو 2012 بالكثير ،
,,
بصراحة لما كنت عضوة متفاعلة بالمنتدى قبل سنوات كان عمري 14 سنة وأكبر همي كان إني أتخرج ههههههههه ، يازينها من أمنية ، والحين عمري 21 سنة خلال هالسنوات أشياء كثيرة تغيرت بحياتي ،
وعيت عالدنيا أكثر وتحققت أمنيتي وتخرجت من الثانوية بسنة 2013 وحاليا أشتغل سكرتيرة بمكتب محاماة ، من سنتين وأنا أداوم
منها أعتمد على نفسي ومنها اكتسب خبرة بمجال القانون ومجال السكرتاريا لكن اكتشت أن ميولي هو القانون وأتمنى إني اتخصص بهذا المجال إذا الله أراد أكمل دراستي ، ومنها أملي وقت فراغي دام إني ماعندي الإمكانية إني أكمل دراستي بالوضع الحالي ، والحمدلله طلعت لي الليسن واشتريت لي سيارة بعد عناء ورسوب وفشل بالمرور ههههههه اللي كان يخليني ارسب بفحص المرور هو الخوف ، والله لايوريكم كمية البكاء والصراخ بعد الرسوب أطلع من المرور وعلى طول أتصل بأمي وأنا أبكي ( يمااه رسبوووني ) وأمي ماغير تضحك علي وتقول كله خير يابنتي المره الجاية بتنجحين أن شاء الله هههههههه
~
ومن الأشياء الي تغيرت كمان إن بعد زواج أختي ( أورجنزا الي كانت مسجلة معانا هنا بالمنتدى ) وسفرها لبريطانيا مريت بتجرية بداية ارتباط (خطوبة) باءت بالفشل ( الحمدلله على كل حال ) ، ودام ان الله اختار هذا الشي هو أكيد خير لي ، كملت حياتي ورفضت فكرة الزواج مبدئيا وبدأت اشغل نفسي بالدوام وأقضي كل وقتي مع أهلي ، بعدها رحنا زيارة ليمن والتقت مشاعري مع ولد خالتي الي عايش بيمن ، وخطبني من أهلي ووافقت عليه وتحدد زواجنا بشهر 1 السنة الجاية 2018 ، بصراحة شكرت ربي كثير وحمدته إني ارتبطت بهذا الشخص وبالفعل كانت أمنيتي إن الانسان الي بكمل حياتي معاه هو الي يختارني وما يكون عن طريق الأهل أو تقليدي ، والله يتمم لنا على خير ويوفق الجميع بحياتهم يارب
حبيت أشارككم كل الي صار معاي خلال فترة انقطاعي عنكم ، رغم ان المنتدى صار فاضي ونادر دخول الإعضاء ، بس يريحني إني افضفض بالمكان الي تعودت اتكلم فيه كثير وأطلع الي بداخلي بفترة بداية نضوجي أو مراهقتي ، ولسه في كثيير أشياء حابة إني اشرككم فيها ، ماخلص الكلام الي بداخلي بس مايصير أقول كل شي مره وحده
السلام عليكم
شخباركم ؟؟
احلى شي أن لسه في أعضاء تدخل المنتدى
المشكله أن الأوقات متفاوتة يعني مافي ناس تدخل مع بعض بوقت واحد هههههههه
يلا أهم شي فيه حياة لسة
من آخر مرة حدثت فيها مدونتي وأنا ما غير داخلة وطالعة للمنتدى ، أقول يمكن اتلاقى مع حد من الي كانو مقربين لي في المنتدى ،
ولقيت ( نفول ) محدثة بمدونتها وهذا الشي أسعدني كثير
وطبعا هي كانت وحده من المقربين لي كثيير وقيمتها على طول عشان تعطيني تويترها
على طاري التويتر ياجماعه الي لسه تدخلون ، ليه ماتحطون حساباتكم بالبرامج السوشال ميديا عشان نتواصل مع بعض
أو تسوون قروب لأعضاء المنتدى بأي برنامج مثل بي بي ام أو واتس أو سناب ... أي برنامج يعني
منها نتحمس أن نرجع ننشط المنتدى ومنها ماينقطع تواصلنا دام جوالاتنا بإيدينا 24 ساعة ، مجرد فكرة أو اقتراح يعني
حساباتي بالسوشال ميديا للي يبى يضيفني :
سنابي ( سناب شات ) / thuraya_ks
بن كودي بالبلاك بيري مسنجر / D11BE88B
انستغرام / thuraya_al5alefi
تويتري موجود بتوقيعي بس ماصرت ادخله كثير
والي تبغى الواتس آب تتواصل معاي بالخاص ونتبادل الأرقام
ماعندي غير هذول الي متفاعله فيهم كثير باستثناء التويتر
.gif){kind=icon}
ألــ ،، ـتــقييمـــ ،، ــآآت
.gif){kind=icon}
رجوع بعد 7 سنوات
.gif){kind=icon}
تقييم أسعدني
30/8/2017
العرض العادي
