دكــــتـــي // عآلم من الثرثره والسوآليف .........!

[ثرثـارهـ]

باتس = تس = ك
= باك

من أول كلمه ترجمت خخخخخ

شوفي وركزي يا مس جولي والمتابعين الكرام ..
اللي أنا آكتبه لكم هي يوميات وقصص وأحداث تصير معي بالبيت وبرا البيت
بس آنا أقوله بأسلوب حوسه الله يحوس العدو .. وشكلي ما أعرف أحتسي إلا كذا
فأستخدم ألقاب وكلام يمكن أحد يفهمه وأحد لا .. لكن بحاول إني أوضح لكم من جديد
وآنتم بعد حاولوا تستوعبون السالفه وتفهمونه بقدر ما ترسمونه بمخكم كيف صارت ..
ودققوا شوي وإن شاء الله تفهمون علي !!

وهاذي بعض الثرثره عن بعض الأحداث بحياتي مب كله .. دا لسآ تحت السواهي دواهي
فآ خلون أعرفكم بنفسي مره ثانيه وهالمره عن حياتي الحقيقيه المنيله

××

أنا حوآء من الحوات << ههه عاد هاذي اللي ماله ترجمه
إسمي ندى .. الدلع عرفتوه طبعآ (ندو) أصغر نفره بالبيت << يآ حليلتس > برا

مسقط الرأس بغرفتي .. بالريآض القميل
فتآة متخرجه من الثانويه وقاعده بالبيت لي ثلاث سنين .. الله يزيدهن هه ..
عايشه الحيآة كله كرف بكرف ..
لدرجة وصلت الإحتراف .. وهذا الشي خلان أفكر أفتح ببـيتـنا معهد تدريب فتيات على الكرف
وأول كورس بعلمهن إياه هو (غسل الحوش) .. لأنه بغسل الحوش تبين الآخلاق
مثل الربع اللي عندي من الصراخ والصجه وصل صوتهن لسابع جار ..

وأنا مادري ليش من بد كل الكرف ما أحب إلا هو .. وما أستانس إلا إذا غسلته
!WTF ( وش تحسين فيه )
لدرجة إن أبوي صار يقول (ترى بوقف الماء يا ندو إن ما بطلتي حركات الشغالات ذي)
مادري بس شكلي بعد مفطره إندومي اليوم


واللي بيسآل ليش ما كملت الجاآمعه بقول (معصي) وما فيه أمل أكمل .. الكرف بالبيت آرحم
نوم وتسدح ومفيش آحلى من كذا
والكرف أقل شي آكسب فيه آجر .. مب دراسه وغثآ وقلق وعذاب .. آعوذ بالله
××

آما آقوى المواقف يوم رحت لمكه ثلاث مرات وآخرته جتن حاله نفسيه ..
آول موقف ذاك اليوم اللي رجعت به للشقه لحالي وركبت المصعد وحطيت على الدور G
اللي يوم انفتح طلع لي مكان مظلم مرعب وفيه جثث بيظا على الآرض تقولون ناس بكفن ..
واللي إكتشفت بعدين إنه دور الغسيل ...

وثآني موقف يوم بعد آرجع من الشقه ويطبن علي السودانيات اللي يبيعن العيش للحَمَام
وصفن على دائره .. وكل وحده تبين أشتري منه ... آنا ما معي ولا ريال .. تورطت
وآنا اللي بغى يغمى علي .. من الصدمه طبعآ
لو ما ربي ستر وجو العرب وسوو زحمه عليهن وفكون منهن الحمدلله

**

ولا يوم أضيع أهلي بالزحمه وبالليل بعد .. هم راحو للتوسعه وآنا دخلت بالمسجد وسيدا


وآخرته ما معي جوال
وما فيه أمل لو آموت إنهم يشترون لي

المهم إن اللي صار رحت للشيخ اللي واقف عند البوابه
لأنه يشبه لأبوي فآنا قلت راح يعتبرن مثل بنته ويفزع لي
<< شفتوا وشلون التفكير المحشش ههه

وفعلا راح وكلم الشرطه وقال لهم المواصفات ..
بنت مضيعتن آهله لابسه عبآيه إسلاميه وقميص روز كحلي << ههه إنكب العفش
و البنت عيونه ما تشوف زين ولابسه نظارات
عمره (××) ولابسه نعال (زنوبا) الله يعزّكم >> مليونين واحد بمكه لابسهم
وأهله الي معه ثلاثه من إخوانه محرمين وأبوه محلق صفر ويلبس نظاره مثل بنته
وأمه وثلاث خوات .. << عفوا .. هه بس سؤال يعني بذاك الوقت من وين بيطلعونهم ..
أقمار صناعيه ولا تحليل DNA
ولا إعلان مفقودين هههههه

والله ما دريت إلا اللي ساحبن مع عباتي من ورا .. الله يرجه طلع (عزوز) ههه
(وين يالمضيعه .. قاعده تفحطين لحالك وين المحرم يالمعتمره)
بس وش عقبه يوم عطيت الرجال كتلوج تفصيلي .. ما بقى إلا أعطيه صورتي بعد ههه
بس موب هو يشبه لأبوي .. يالله عادي
هههه بس تدرون وين الغبآء عشان تعرفون إني فعلاً أغبى إنسانه على وجه الآرض ..
إني عطيته كل المعلومات والتفصيلات الشكليه بس أهم معلومه اللي هي (إسمي) ما عطيته إياه
اللي كان ممكن يحل القضيه من دون توصيف وفضايح

ولذلك بعد كل هالمواقف بطّلت أروح لمكه إلا مع خوالي وبناتهم .. عشان معهن جوالات ههه
بس ما لآحظتوا .. إذا هاذي عمره وصار كذا .. أجل لو حجّيت وش بيصير ..
بيربطونن بحبل تقـل بقره ..!

××

آوما آقوى المواقف والآزمات اللي صارت لي ..
كانت السنه اللي راحت يوم تصبخ الغساله على راسي
وأدخل بالمستشفى ثلاث مرات وآنتم تذكرون وعشتوا الآزمه معي ..
وآنا من بعده ما إستوعبت وش اللي صار ..! يمكن فقدت الذاكره

ولا بنات عمي العله اللي آكره شي بحياتي هن ..
سألن عن مادري وش هالحب العجيب اللي نزل عليهن من السما فجعه
سبحان مغير الآحوال ..!

ولا خالاتي وبنات خوالي اللي بالقصيم وحنا بالرياض ووصلهم الخبر ..
صرت آشك في شبكة Wifi بالمستشفى .. تبث من القصيم للرياض وتجيهم آخر آخبارنا
ومير إتصلوا يسلمون علي وما تشوفين شر والحمدلله على سلامتك

حشآ .. بشاره هي .. ولا جبت ولد وآنا مادري

< وات

ولا جريدة (سبق) نزلت الخبر ذاك اليوم وما بقى أحد ما درى عن
لدرجة إني توقعت الوزير الدكتور (الربيعه) بيجي يشوف الحاله بأم عينه ..
على كثر اللي دروا ما بقى إلا هو .. وش تبونن آتوقع بعد أكثر من هيك

لأني من جد وصدق أول مره أحس إني مهمّه لهالدرجه عند آهلي .. < إحلفي
لأن استغربت تصرفاتهم اللي صارت دلع زياده عن اللزوم
مادري متى طلع هالحنان الزايد
بس شكلهم توهم يفيقون من الغيبوبه بعد 22 سنه ويدرون إن عندهم بنت إسمه ندو
اللي ما قدروا وضعه وما إهتموا به ولا بمشاعره الحساسه
هذه الفتاة المنسيّه .. المعذبه ومعقده نفسياً
< تكفين كولي تبن وإنطمي بس

××

عاد مابي أطول عليكم .. شكلي ثرثرت عن نفسي واجد ..
وشكلك يا مس جولي ما فهمتي شي ههههههههههه

[ثرثـارهـ]

وخلونا نرجع للأونيات .. الخوات الكبار أمهات العيال

(stc) +(موبايلي) + (زين) .. ( تفقع وجهي يوم قلت أسمائهن صدق هههه)

××

أما النونات الآنسات / وآخرهم (My)

نبدأ بأكبرهن (فريزوه) لأنه بارده ومفهيه
بس لا عصبت نتشهد على أنفسنا
لأنه تتحول إلى إنسانه أخرى لا نعرفه ولا تعرفنا والعياذ بالله من الشيطان الرجيم

××

(فليفله) هاذي دمه حآر فلفل أسود حبحر أحمر هندي كلو كلو
ولقبه الثآني (شطة قودي) لأنه دايم محترقه
.. وفجأه ترتفع حرارته العصبيه والنفسيه
لذلك نحن دائما نتجنبها إذا قلبت على الوجه الثاني ..

××

والهاديه مس (فِلّوها) هاذي الإنسانه ما شاء الله عليه لا إله إلا الله ..
إسمه على مسمى .. وآقرب شخص لي بالبيت وما أقدر أتكلم عنه بشي من غير ما أمدحه
هالبنت بشوشه ودايما فالته فلّه وضحك .. وكله على بعضه أطلق إخت بالدنيا .. بسس
تذكرن بإختي ( الله يرحمه ويغمد روحه الجنه .. )

بس مب بعض الناس اللي فوق ..
اللي من آشوفهن آقول (آمنت بـ الله على هالنهار)
عقدة حيآتي كله هي (فريزوه) أم المحارش تعذيب نفسي ما عمري شفت مثله ..
لا وماجستير علم نفس بعد .. كيف تجي مادري
أحسه بتمرض الناس مب معالجتهم ..


***

اما البراذرات (الإخوان العلل) ذولا حاقه تانيه برضو مالهم حل
كل واحد منهم غير الثاني .. ما بينهم أي تشابه إطلاقا

نبدأ بـ (الآمير تشآرلز) هذا مشكلته دلخ أحيانا .. وينلعب عليه
بس والله إنه طيب وعلى نياته وحبوب .. ولو إن الطيبه بهالزمن ما تجيب إلا البلآ


××

(شآهي ربيع)

.. هذا عكس اللي فوق تماما .. نذل .. وخيانه ..
وما يعطي أحد وجه دايم مع نفسه وساحب عالكل
وآنا بسحب عليه بعد
ومن مميزاته يحب الشآهي ههه

××

(فوفو) ـ هاذي بالله العله .. هذا أقدر أقولكم إنه بنت ..
إنسان حساس مره .. لو طلعت حبّه بس بوجهه ينصرع ويقلب علينا الدنيا ..
و كل مره يروح للمستشفى يطيح الدكتور وجهه ويقوله ياخي أنت رجل ..


يعني خلك خشونه بالعربي وش تبي بكريمات تنعيم حقة حريم ..
وما عندكم أحد ..
\

لدرجة إننا لا رحنا للسوق وراح معنا .. يقعد يختار لنا

بس تصدقون إن ذوقه أحسن من ذوقـنا هههههه بذي له حق علي
لأني لا رحت معه أعتمد على إختياره وأشاوره بعد .. < طبعآ بقره

بس صرنا نهج من الحريم قامن يضحكن علينا
من هالشنب المضيع وجاي معهن

طبعآ آنا ما ودي آحرجه وآروح معه كل مره .. أفضل شي نروح قروب الأخوات بس
لأن السوق أصلا كله للحريم .. والرجال هم اللي خاشين عرض .. ولا ؟

يكون يمكن لو أقوله له الكلام ذا عادي هههه
ويمكن يعصب ويمكن يقلب .. بس لاحظت إنه يتقبّـل الصراحه والنقد
أحيانا يواجه الموقف ويرد وإنسان عادي يعني بس أنا أحب أحش فيه
يفهم علي دايما .. لذلك أعتبره أقرب واحد فيهم


××

(النشبه) هذا أبو العلل كله .. أخو فريزوه التوؤم ..
هذا اللي أمس جاء ونشب لي على الاندومي ..
إنسان حياته كله محارش .. وملقوف مع مرتبة الشرف
وما أحب أصبح بوجهه أبدن .. لأني لا شفته ينقلب مزاجي وأعصب

هذا دايما أغني له ..
(يا قاعدين يكفيكو شر الجايين يا شر إمشي .......)
ومواقفي معه سبق وذكرته ..
الظاهر يبي الملاسه تجيه عل ظهره مره ثانيه


××

(قراند)

هذا مادري وش أقول عنه .. غريب الأطوار .. متقلب المزاج
مره معصب ..ومره مفهي .. مره طيب .. ومره النفس شينه

وهو واحد عاطل باطل .. ومعلق إلى يومكم ذا بالجامعه مستوى ثالث
فصلوه مرتين ورجع بواسطه خخخ

كل همه يلعب بلاستيشن .. أون لاين 24 ساعه بقراند .. ومسوي عصابه مع شلته
يعني واحد منتهي .. بس لا طلبته ما يرد الطلب ..
لأني أنا وياه متشابهين بأشياء كثيره .. حتى نحب ناكل من نفس المطعم بعد


××

[ثرثـارهـ]

‏​‏​‏​‏​‏​‏​‏​‏​حياة البنت السعوديه

××

‏​‏​‏​‏​‏​‏​‏​‏​امي ليش مانسافر امريكا:/

( إذا اعرستي سافري مع رجلك )



امي اليوم بالحفله بلبس فستان قصير ;

(إذا اعرستي إلبسي عند رجلك )



امي بنام بيت خالتي اليوم خميس يعني وناسه

( إذا اعرستي يخليك رجلك تنامين عند اللي تبين



امي مليت من قعدة البيت بروح عند صديقتي اغير جو

( إذا اعرستي روحي المريخ )




امي متى بحج

( إذا اعرستي حجي مع رجلك )




امي :'( أبي أموت

( موتي ببيت رجلك موب عندي)

امي لييش دايما تقولين إذا عرستي وإذا عرستي

( إذا اعرستي أقولك )



‏​ ۆ اقهر ‏​شُيےَّ . .



امي بقص شعري..

( اذا تزوجتي قصيه )

امي بصبغ شعري

( اذا تزوجتي إصبغي شعرك )


وتبقى أحلام الفتاه السعوديه متعلقةً بذلك الفتى

××

وش هالأم المصرقعه ذي ههههههههههه

[ثرثـارهـ]

وإذا أتى ذلك الفتى الذي تعلقت فيه كل الآمال
والذي عن طريقه ستتحقق كل الأحلام
التي رسمتها الأم بخيال إبنتها

...

مالذي سيحدث بعد ذلك ؟؟؟
الإجابه كما قالت الأم :

( إذا أعرستي تعرفين )







(((((((( ))))))))

[ثرثـارهـ]

هلا بك ..

مع إني ما فهمت شي من إسمك

ومستمره إن شاء الله ... قدام